(દમણગંગા ટાઈમ્સ પ્રતિનિધિ)
ઉમરગામ, તા. ૩૦ ઃ તાલુકા પંચાયત કચેરીમાં જિલ્લા પંચાયતના પરિપત્રના આધારે જાહેર કરાયેલા પ્રમાણપત્ર મુજબ તાલુકા પંચાયતના વર્ગ-૩ સંવર્ગમાં કુલ ૬૪ મંજૂર મહેકમ સામે માત્ર ૩૫ જગ્યાઓ ભરાયેલી છે.
જ્યારે ૨૯ જગ્યાઓ હજુ પણ ખાલી હોવાનું સામે આવ્યું છે. જેના કારણે વિવિધ શાખાઓની વહીવટી કામગીરી પર અસર થવાની શક્યતા વ્યક્ત કરવામાં આવી રહી છે.
માહિતી મુજબ તાલુકા વિકાસ અધિકારી, હિસાબનીશ, નાયબ હિસાબનીશ, અધિક મદદનીશ ઈજનેર, આંકડા મદદનીશ સહિતના કેટલાક સંવર્ગોમાં તમામ જગ્યાઓ ભરાયેલી છે. જોકે વિકાસ અધિકારી (પંચાયત)ની ૩માંથી ૧ જગ્યા અને વિકાસ અધિકારી (સહકાર)ની ઍકમાત્ર જગ્યા ખાલી છે. સૌથી વધુ ખાલી જગ્યાઓ તાલુકા કક્ષાના મંત્રી સંવર્ગમાં જોવા મળી છે, જ્યાં ૩૪ મંજૂર જગ્યાઓ સામે માત્ર ૨૦ કર્મચારીઓ ફરજ બજાવે છે અને ૧૪ જગ્યાઓ ખાલી છે. ઉપરાંત **સીનિયર કલાર્ક (હિસાબી)**ની ૫માંથી તમામ ૫ જગ્યાઓ ખાલી છે, જ્યારે જુનિયર કલાર્ક (વહીવટ)**ની ૬માંથી માત્ર ૧ જગ્યા ભરાયેલી હોવાથી ૫ જગ્યાઓ ખાલી છે. ડ્રાઈવર (આઉટસોર્સ)**ની ૨માંથી ૧ જગ્યા પણ ખાલી હોવાનું પ્રમાણપત્રમાં દર્શાવવામાં આવ્યું છે.
આટલી મોટી સંખ્યામાં જગ્યાઓ ખાલી હોવાના કારણે નાગરિકોને મળતી સરકારી સેવાઓ અને વિવિધ વિકાસલક્ષી યોજનાઓના અમલીકરણમાં વિલંબ થવાની શક્યતા ઊભી થઈ છે. સ્થાનિક સ્તરે ખાલી જગ્યાઓ વહેલી તકે ભરવા માટે માંગ ઉઠી રહી છે.