દમણ, તા. ૦૯ ઃ ડ્રગ્સ કન્ટ્રોલ ઓફિસર્સ (ઈન્ડિયા) વેલફેર ઍસોસિયેશનનું  તા. ૧૧ જુલાઈ, ૨૦૨૬ના રોજ દમણ ખાતે ચોથું રાષ્ટ્રીય સંમેલન યોજાશે. દેશના વિવિધ રાજ્યોના ડ્રગ્સ કન્ટ્રોલ વિભાગો તથા કેન્દ્ર સરકારના ૪૦૦થી વધુ અધિકારીઓ આ સંમેલનમાં ભાગ લઈ દવા નિયમન વ્યવસ્થાને વધુ અસરકારક, પારદર્શક અને ટેક્નોલોજી આધારિત બનાવવાના વિવિધ મુદ્દાઓ પર વિસ્તૃત ચર્ચા કરશે. સંમેલનમાં કોસ્મેટિક્સ અને આયુર્વેદિક ઉત્પાદનોના ઉત્પાદન, ગુણવત્તા નિયંત્રણ, લાઇસન્સિંગ, લેબલિંગ, બજારમાં દેખરેખ તથા ગ્રાહકોની સુરક્ષા માટેના નિયમોને વધુ અસરકારક રીતે અમલમાં મૂકવા અંગે વિચારવિમર્શ કરવામાં આવશે.
ઉપરાંત ડ્રગ્સ ઍન્ડ મેજિક રેમેડીઝ (ઓબ્જેક્શનેબલ ઍડવર્ટાઇઝમેન્ટ્સ) ઍક્ટ, ૧૯૫૪ હેઠળ ભ્રામક અને ગેરમાર્ગે દોરતી દવાઓ તથા આરોગ્ય સંબંધિત જાહેરાતો સામે કડક કાર્યવાહી અંગે પણ ચર્ચા થશે. દેશમાં વધતી નાર્કોટિક્સ અને સાયકોટ્રોપિક પદાર્થોના ગેરકાયદે ઉપયોગ અને દુરુપયોગ સામે વધુ અસરકારક નિયંત્રણ માટે વિવિધ નિયમનકારી ઍજન્સીઓ વચ્ચે સંકલન મજબૂત બનાવવાની જરૂરિયાત પર પણ ભાર મૂકવામાં આવશે. ઍસોસિઍશનના રાષ્ટ્રીય પ્રમુખ જી. કોટેશ્વર રાવે જણાવ્યું હતું કે નશાકારક દવાઓના ગેરકાયદે વેપારને રોકવા, શંકાસ્પદ સપ્લાય ચેઇનની દેખરેખ, કાયદાના અસરકારક અમલ અને સંબંધિત ઍજન્સીઓ વચ્ચે માહિતીના ઝડપી આદાન-પ્રદાન જેવા મુદ્દાઓ ચર્ચાના કેન્દ્રમાં રહેશે. રાજ્ય સરકારો અને કેન્દ્ર સરકાર વચ્ચે વધુ સશક્ત સંકલન, સંયુક્ત નિરીક્ષણ, માહિતીની આપ-લે, ઍકરૂપ નિયમન અને કાયદાના અસરકારક અમલીકરણ માટેની વ્યૂહરચના અંગે પણ વિચારણા કરવામાં આવશે. સંમેલનમાં આર્ટિફિશિયલ ઇન્ટેલિજન્સ આધારિત સ્માર્ટ ગવર્નન્સ, જોખમ આધારિત નિરીક્ષણ, ડિજિટલ મોનિટરિંગ, ડેટા ઍનાલિટિક્સ, ઑનલાઇન લાઇસન્સિંગ, ફરિયાદોના ઝડપી નિકાલ અને નિયમન પ્રક્રિયાને વધુ કાર્યક્ષમ બનાવવા માટે આધુનિક ટેક્નોલોજીના ઉપયોગ પર નિષ્ણાતો માર્ગદર્શન આપશે.
આ ઉપરાંત નકલી, ભેળસેળયુક્ત અને ગુણવત્તાહીન દવાઓ સામે કડક કાર્યવાહી, અધિકારીઓની ક્ષમતામાં વધારો, તાલીમ, જનજાગૃતિ અને દેશવ્યાપી દવા નિયમન વ્યવસ્થાને વધુ મજબૂત બનાવવા માટેના મુદ્દાઓ પર પણ વિસ્તૃત ચર્ચા થશે. આ રાષ્ટ્રીય સંમેલન દવા, કોસ્મેટિક્સ અને નાર્કોટિક્સ સંબંધિત નિયમન વ્યવસ્થાને વધુ મજબૂત બનાવવા તેમજ ટેક્નોલોજી આધારિત સુશાસનને પ્રોત્સાહન આપવા માટે મહત્વપૂર્ણ મંચ સાબિત થશે તેવી આશા વ્યક્ત કરવામાં આવી રહી છે.