(દમણગંગા ટાઈમ્સ પ્રતિનિધિ) દમણ, તા. ૦૨ , દમણમાં પ્રદેશ ભાજપ પ્રભારી પૂર્ણેશ મોદી, સહ પ્રભારી દુષ્યંત પટેલ અને પ્રદેશ પ્રમુખ દીપેશ ટંડેલના માર્ગદર્શન હેઠળ અને પ્રદેશ ભાજપ ઉપપ્રમુખ નવીન આર પટેલની આગેવાની હેઠળ નવી કાર્યકારી સમિતિની રચના માટે બેઠકનું આયોજન કરવામાં આવ્યું હતું. ભાજપ જિલ્લા પ્રમુખ અસ્પી દમણિયાની હાજરીમાં યોજાયેલી આ બેઠકમાં મરવડ ભાજપ મંડળ પ્રમુખની જવાબદારી હાર્દિક પ્રવીણને સોંપવામાં આવી હતી. નવી કમિટીમાં ૪ ડેપ્યુટી હેડ, ૪ સેક્રેટરી, ૧ જનરલ સેક્રેટરી, ટ્રેઝરર અને ૧૦ કારોબારી સભ્યોનો સમાવેશ થાય છે. આ દરમિયાન ભાજપના કાર્યકરોને ઘરે-ઘરે જઈને લોકોને ભારતીય જનતા પાર્ટીની લોક હિતકારી નીતિઓથી વાકેફ કરવા સૂચના આપવામાં આવી છે. આ નવી સમિતિઍ લોકસભાની ચૂંટણી પહેલા મોદી સરકાર અને કેન્દ્રશાસિત પ્રદેશ પ્રશાસક પ્રફુલ પટેલના માર્ગદર્શન હેઠળ રાજ્યમાં થયેલા રૂ. ૧૩૫૦૦ કરોડના ઐતિહાસિક વિકાસ કાર્યોની માહિતી દરેક વ્યક્તિ સુધી પહોંચાડવાની છે. તેમણે નવી સમિતિના અધિકારીઓને આજથી જ જનસંપર્ક શરૂ કરવા અને ભાજપની નીતિઓ, રાજ્યમાં થયેલા વિકાસના કામો અને મોદી સરકારની યોજનાઓ વિશે લોકો વચ્ચે જવા સૂચના આપી હતી.
